طريقة عمل القلقاس

هاتى القلقاس وقشريه وقطعيه مربعات
وحطى اللحمة تتسلق على النار ومعاها بصلة والملح والفلفل عادى جدا
واغسلى القلقاس مرة واحدة بس واوعى تفركيه جامد عشان اللزاجة بتاعته متروحش
وبعدين صفى الميه من عليه
وبعد ما اللحمة تستوى 3/4 سواها حطى القلقاس فى حلة اللحمة مع الشوربة
وسيبيهم على النارلحد ما يستوو سوا وطفى عليهم النار
هاتى بقى حزمتين سلق وحزمة كسبرة وقطفيهم واغسليهم كويس وحطيهم فى حلة مية على النار
وسيبيهم لحد ما يدبلوا كويس وبعدين شيليهم وصفيهم
وتكونى محضرة راس ثوم ومقشراها ودقيى الثوم فى الهون
وهاتى طاسة وحطى فيها ملعقتين سمن كبار ومليانين وحطيهم على النار وحطى عليهم الثوم وشوحيه دقيقتين بس وبعدين حطى عليه السلق والكسبرة وقلبيهم كويس
على النار واستمرى فى التقليب لحد ما المية اللى فيه ما تتشرب والخلطة الخضراء تجف قليلا
وشيليهم بقى من ع النار واطحنيهم فى الهون تانى وبلاش الكبة ولا المفرمة ولا الخلاط وحطيهم بقى على القلقاس فى الحلة واديهم غلوة على النار وطفى النار
وحتبقى محترفة فى عمل القلقاس
والله القلقاس دا حاجة حلوة اوى انا بموت فيه انا كدة اديتك سر المهنة بالهنا